Aprobado o Plan de Investimentos sen debate plenario

O BNG de Portas denuncia a imposición do Plan por parte do grupo de goberno e a falla de información e control na súa elaboración

O martes 13 de xaneiro a Xunta de Goberno do Concello de Portas, constituída integramente por membros do Partido Popular, aprobou un plan de investimentos con cargo ao Fondo Estatal de Investimento Local por valor de máis de medio millón de euros. Excluíndo deste xeito ao Bloque Nacionalista Galego de todo o proceso de elaboración, aprobación, adxudicación, exucución e control do plan.

O BNG considera que o pleno da Corporación municipal debería ser o órgano que formulase a proposta de investimentos, e así o solicitou nunha moción presentada o 22 de decembro pasado, na que tamén se propoñían obras subvencionables entre as que se pode destacar a reparación dos pavillóns deportivos de Portas e Romai, a rehabilitación dos centros culturais de Lantaño e Romai, a contratación de persoal para a limpeza de pistas e camiños e o saneamento dalgúns lugares.

O grupo de goberno do PP négalle sistematicamente á oposición a máis mínima información pois non convocou nin comisión informativa, nin xunta de portavoces, nin pleno, aprobando o plan de investimentos en xunta de goberno, onde só está representado o Partido Popular por decisión do alcalde. Impedindo incluso o acceso ás actas das sesións da xunta de goberno, polo que o Bloque non pode cumprir o mandato dos seus votantes e controlar a opaca acción do goberno municipal.

O grupo municipal do Bloque Nacionalista Galego denuncia a falla de debate e a ocultación de información por parte do grupo de goberno do PP, e reclama se teñan en consideración as obras propostas na moción nacionalista para cumprir a principal premisa do Fondo Estatal que é crear emprego ocupando a maior cantidade de man de obra posible.

Asemblea Local de Portas

O venres 16 de xaneiro ás 21:00 h. celebrarase unha asemblea local no Teleclube de Romai.
Trataranse temas de política local e convención eletoral nacional.
Rógase puntualidade.

Fomento defende a Alternativa 7 para a Variante Oeste de Caldas en resposta ao BNG

A deputada en Madrid do BNG, Olaia Fernández Davila, dirixíase ao Ministerio para trasladarlle o rexeitamento frontal dos concellos de Portas e Caldas a esta alternativa que terá un forte impacto social por atravesar a parroquia de Bemil

O Ministerio de Fomento vén de respostar á deputada do BNG no Congreso, Olaia Fernández Davila, que a alternativa 7 para a variante oeste de Caldas de Reis “é a que se estimou como a máis beneficiosa” aínda que recoñece que os concellos de Caldas e Portas “amosáronse partidarios de que sexa sometido de novo o estudo a D.I.A coa alternativa C3 que se desenvolve polo suroeste de Caldas”.

Unha alternativa criticado polos concellos e veciños

A deputada do BNG dirixíase ao Ministerio de Fomento para trasladarlle o rexeitamento frontal dos concellos de Portas e Caldas a esta alternativa que terá un forte impacto social debido a que atravesa a parroquia de Bemil, que “xa padeceu unha grande afectación pola construcción de varias estradas e un gaseoducto”.

Davila critica ao Ministerio que optou por unha alternativa que con moitas alegacións dos concellos aludidos. Un trazado que ademáis do seu impacto tampouco “reduciría o tráfico polo centro de Caldas nen resolvería o problema da conexión coas praias e a estrada de Portas”. A deputada do BNG subliña que os veciños aseguran non entender a “decisión unilateral do Ministerio de Fomento”.

Fomento admite “non coincidir” coas corporacións

Na resposta de Fomento á parlamentar do BNG, o Ministerio redunda na argumentación a favor da alternativa 7 e asegura que “durante a redacción do estudo informativo mantivo a adecuada coordenación coas corporacións locais” e admite que as opinións dos concellos “non son coincidentes co Ministerio”.

O estudo informativo aínda non foi aprobado

Por último, Fomento remata sinalando que “en todo caso, o estudo informativo non foi aprobado definitivamente aínda”.

O Alcalde incumpre os acordos plenarios e non convoca o Pleno Ordinario de decembro

O Alcalde non convoca pleno ordinario en decembro, incumprindo a lei de Bases de Réxime Local e os acordos plenarios que el mesmo impuxera coa súa maioría absoluta, negándose ademáis a dar algún tipo de explicación.

Na sesión extraordinaria do Pleno da Corporación Local do Concello de Portas de data 13 de xullo de 2007 estableceuse a periodicidade das sesións plenarias, cos únicos votos a favor do Partido Popular, textualmente: “unha cada dous meses, o último venres dos meses pares ás 14.50 h”. Coa excepción de: “se este día cadra en festivo, a sesión trasladarase á véspera ou ó seguinte día hábil”.
O acordo plenario incúmpreuse ao non celebrarse pleno o pasado venres 26 de decembro de 2008, que era último venres de mes par e non festivo.
O único obxectivo deste modo de proceder é imposibilitar que os concelleiros da oposición poidan programar as súas axendas cun mínimo de antelación, impedindo incluso a súa asistencia e evitando ter que responder ás súas preguntas.

Pleno Extraordinario

O martes 30 de decembro ás 14:50 h. celebrarase un pleno extraordinario na casa do Concello coa seguinte orde do día:
1. Lectura e aprobación actas anteriores.
2. Coñecemento resolucións Alcaldía.
3. Rogos e preguntas.

O PP recorre á calumnia para ocultar a súa incapacidade política ante as iniciativas do BNG

Mentres o Concello navega sen rumbo e sen temón, algúns membros destacados do Partido Popular adícanse, para tapar os seus erros, a propagar mentiras e falsedades.

A estabilidade laboral dos traballadores do Concello é un dereito, non un favor do alcalde

O PP durante moitos anos negoulle os seus dereitos laborais a moitos empregados municipais, incumprindo o Estatuto dos Traballadores, xa que se lles facía un contrato temporal cando debería ser indefinido. Agora que conseguiron o que é deles por dereito, quere venderllo como un favor persoal, igual que o facía cando lles renovaban ano a ano.
Este persoal era e é necesario para o funcionamento do Concello polo que o Bloque sempre defendeu e pediu que os seus contratos fosen fixos. Agora o Partido Popular, que mantivo durante moito tempo nunha situación precaria e irregular a moitos dos traballadores do Concello, vai dicindo por aí que o BNG non quere que os empregados municipais que gañaron as prazas fixas as poidan acadar, o cal é unha desprezábel mentira. O PP debería explicar por qué durante 15 anos non se estabilizou laboralmente a este persoal e cales foron as formas empregadas nos concursos destas prazas, en lugar de difundir falsidades co único obxectivo de ocultar as súas propias miserias.

As irregularidades do alcalde na Xunta de Montes de Romai está a poñer en perigo importantes investimentos

A Xunta pretende construír unha depuradora de auga potábel para o abastecemento das parroquias de Lantaño, Portas e Romai, que se situará no monte veciñal de Romai, polo que necesita dunha cesión de terreos por parte da Comunidade de Montes, que foi aprobada en Asemblea Xeral. Non obstante, esta cesión pode traer problemas porque a xunta reitora da Comunidade de Montes de Romai tiña que ter convocado eleccións antes do 27 de xullo de 2007 cousa que non fixo, atopándose polo tanto en situación alegal así como todos os acordos que tomen.
Como o Partido Popular e máis o alcalde non son capaces de gobernar e resolver este problema, ocultan os seus fracasos e miserias, acusando ao BNG de opoñerse á construción da depuradora cando, evidentemente, o Bloque desexa a instalación da depuradora e canto antes. Debería ser o alcalde quen explique por qué a xunta reitora da Comunidade de Montes de Romai, da que el mesmo se autodefiniu como presidente en funcións, tardou máis de 16 meses en convocar eleccións, facendo que se poñan en risco importantes investimentos da Xunta de Galiza no noso concello e mantendo unha actitude bananeira e allea ao sentido común e o bo goberno que os veciños e veciñas de Portas queren.

Portas perde as subvencións concedidas por Medio Rural por segundo ano consecutivo

Cos cartos perdidos poderíanse crear empregos e protexer ás vivendas contra o lume

Unha vez máis o Concello de Portas renunciou en 2008 a 36.000 euros procedentes da Consellaría do Medio Rural para a limpeza das zonas próximas aos núcleos. Debido á inoperancia do grupo de goberno do Partido Popular, en dous anos o Concello deixou de ingresar 12 millóns de pesetas que poderían crear varios postos de traballo durante todo o ano, e evitar os riscos de lumes preto das casas no verán.