O BNG presenta unha moción para aprobar unhas bases reguladoras de subvencións no concello de Portas

O BNG denuncia a discrecionalidade das subvencións

O grupo de goberno do Partido Popular do Concello de Portas concede discrecionalmente subvencións, o que vulgarmente se coñece como "concesión a dedo", sen ningún tipo de fiscalización e control por parte da oposición. Non se cumpren os principios básicos de publicidade, obxectividade, libre concorrencia, igualdade, transparencia e non discriminación na xestión de subvencións, tal como dispón a Lei 38/2003, do 17 de novembro, Xeral de Subvencións.
O Concello de Portas non dispón, con carácter previo ao outorgamento de subvencións, de normas que establezan as bases reguladoras de concesión, non motiva os acordos de concesión de subvencións, e tampouco cumpre a obriga de esixir a xustificación, pola entidade beneficiaria, da aplicación dos fondos recibidos.
Estas afirmacións, xa expresadas polo Consello de Contas de Galicia nun “Informe de fiscalización do Concello de Portas” de data xullo de 2006, seguen estando igualmente vixentes a día de hoxe.

O grupo municipal do Bloque Nacionalista Galego reclama do Concello de Portas que cumpra a lei xeral de subvencións, evitando a concesión discrecional, irregular e non motivada de subvencións, e solicita a elaboración de ordenanzas municipais específicas de subvencións para:
- Asociacións culturais e deportivas,
- Comisións de festas e outras entidades sen ánimo de lucro.

O concello de Portas incumpre unha sentenza xudicial

Pleno Extraordinario para pagar unha débeda de hai 4 anos

Mañá, martes 12 de maio ás 14:50 h., celebrarase un pleno extraordinario na casa do Concello de Portas cun polémico punto da orde do día: “Aprobación pago a empresa Varela Villamor”.
Nos anos 2004 e 2005, a empresa construtora Varela Villamor realizou uns traballos de rehabilitación no edificio da Azucreira de Portas, froito dun convenio coa Xunta de Galicia. O concello, gobernado entón e agora polo Partido Popular, recepcionou as obras o día 11 de agosto de 2005, pero negouse a pagarlle á empresa as últimas certificacións por valor de máis de 84 millóns das antigas pesetas, a pesares de que posteriormente o concello seguiu recibindo puntualmente da Xunta todos os cartos comprometidos do convenio asinado.
A empresa construtora demandou ao concello por impago, e obtivo unha sentenza xudicial favorable o día 25 de marzo de 2008, pola cal o concello de Portas lle tiña que pagar a cantidade de 507.465,47 €, máis os intereses correspondentes (recurso 41/07 do xulgado contencioso-administrativo nº 3 de Pontevedra).
Catro anos despois de feitas as obras e máis dun ano despois de publicada a sentenza xudicial, o concello de Portas segue sen liquidar a débeda. Sorprendente situación, tendo en conta o contexto de grave crise económica, especialmente no eido da construción, e máxime cando o Alcalde debería estar especialmente sensibilizado, pois tamén é empresario do sector.
No pleno extraordinario de mañá, o grupo de goberno do Partido Popular pretende aprobar o pago, esquivando con artimañas a súa tramitación correcta a través dos orzamentos municipais, que a mediados de maio seguen sen aprobarse.

O Bloque Nacionalista Galego de Portas denuncia a inxustificable actitude do grupo de goberno do Partido Popular que non asume dende hai 4 anos unha débeda coa empresa construtora Varela Villamor, a pesares de ter recibido da Xunta de Galicia subvencións para o pago dos traballos, e unha sentenza xudicial de marzo de 2008 desfavorable para os intereses municipais.

Pleno Extraordinario

O martes 12 de maio ás 14:50 h. celebrarase un pleno extraordinario na casa do Concello coa seguinte orde do día:
1. Aprobación acta sesión anterior.
2. Nomeamento membros de mesas electorais, eleccións Parlamento Europeo Xuño 2009.
3. Aprobación pago a empresa Varela Villamor.

O BNG presenta una moción para mellorar a seguridade vial no Concello de Portas

O BNG solicita a colocación de espellos convexos en cruces con escasa visibilidade
As interseccións nas estradas son puntos de especial perigosidade para o tráfico rodado, polo que é obriga do concello de Portas poñer todos os medios dispoñibles para aumentar a seguridade nestes puntos.
A utilización de espellos convexos en certos cruces ten demostrado ser moi útil para aumentar a visibilidade e reducir os accidentes de tráfico, cun moi reducido custo económico.
Complementando a moción que o BNG presentou en outubro de 2008 titulada “Adopción de medidas para reducir a perigosidade do tráfico no Concello de Portas”, o luns 20 de abril rexistrou unha nova moción solicitando a colocación de espellos convexos en varios cruces do concello que se caracterizan pola súa pouca visibilidade. Algúns exemplos son os cruces de Chandouteiro en Romai, A Bouza en Briallos, Casal en Lantaño e Liñar en Portas.
O grupo municipal do Bloque Nacionalista Galego reclama do Concello de Portas que realice as xestións oportunas para colocar espellos convexos nos cruces con escasa visibilidade para o tráfico.

Pleno Ordinario

O venres 24 de abril ás 14:50 h. celebrarase un pleno ordinario na casa do Concello coa seguinte orde do día:

1. Aprobación actas sesións anteriores.

2. Coñecemento resolucións da Alcaldía.

3. Rogos e preguntas.

O Alcalde négase a incluir na orde do día tres mocións que o grupo municipal do BNG presentou en tempo e forma. Non ten ningunha intención de debater ideas coa oposición, de modo que baleira de contido os plenos ordinarios. Ademais, négase sistematicamente a responder as preguntas plenarias do Bloque, polo que os Plenos da Corporación transfórmanse en meros actos administrativos para xustificar que os concelleiros do Partido Popular cobren 60 euros por asistencia, que non se alonga máis de 5 minutos.

O BNG reclama nunha moción a reparación urxente da cuberta do lavadoiro de Romai Vello

O grupo de goberno do PP non defende o patrimonio do Concello de Portas

No lugar de Romai Vello, parroquia de Romai, hai un lavadoiro cuberto por un tellado de placa soportado por catro vigas prefabricadas de formigón pretensado, que á súa vez descansan sobre catro piares de formigón armado.
Este tipo de vigas prefabricadas están deseñadas para formar parte de forxados unidireccionais de edificacións, e non para soportar grandes cargas, como sucede no caso da cuberta do lavadoiro de Romai Vello.
Esta inadecuada utilización das vigas prefabricadas provocou a súa rotura por cortante nas proximidades dos apoios cos piares. Para evitar o derrube da construción os veciños tuveron que colocar dous puntais metálicos temporais.
Esta situación de apontoamento, que debería ser só provisional, estase a converter pola inacción do grupo de goberno municipal do Partido Popular nunha situación perigosa e sen perspectivas de arranxo a curto prazo.
O grupo municipal do Bloque Nacionalista Galego reclama do Concello de Portas que realice as xestións oportunas para reparar de forma urxente a estrutura de cuberta do lavadoiro de Romai Vello.

O BNG esixe a creación dun punto limpo en Portas

O BNG presenta unha moción para implantar unha xestión integral de residuos sólidos no concello de Portas

Na actualidade existen numerosos depósitos incontrolados de lixo no concello de Portas que non paran de medrar en tamaño e número. Debido á ausencia dun lugar apropiado en Portas para a xestión dos residuos procedentes de escombros de obras, actividades agrícolas, aceites domésticos, pilas, fluorescentes, etc., algunhas persoas utilizan os montes veciñais como vertedoiros.
Mal exemplo foi o que dou o propio Concello hai uns meses cando creou un vertedoiro ilegal de voluminosos na finca da Azucreira a escasos metros da Galescola, o Centro de Día e o auditorio municipal.
No pasado, tense ocultado o problema dalgúns vertedoiros tapándoos con terra, sen embargo, nin os fai desaparecer, nin resolve a xestión de futuros residuos, que seguen indo a parar ao monte.
Ademais, e a pesares da insistencia do BNG de Portas, segue sen resolverse a problemática da escaseza de colectores de vidro e papel no concello. Unicamente 4 colectores de vidro e 4 de papel nun concello de máis de 3200 habitantes son absolutamente insuficientes, polo que habitualmente están desbordados e desincentivan a reciclaxe.
Tampouco se baleiran de forma periódica os colectores de lixo, vidro e cartón, ou se recollen de forma sistemática a recollida de voluminosos.
É necesario que o concello de Portas implante unha xestión integral dos residuos sólidos, que solucione definitivamente a problemática dos vertedoiros incontrolados nos montes veciñais e promova a reciclaxe e a autocompostaxe.
O grupo municipal do Bloque Nacionalista Galego esixe que o Concello de Portas adopte as medidas necesarias para resolver de xeito definitivo e acaída a xestión integral dos residuos sólidos, creando un punto limpo, instalando máis colectores de vidro e papel, e organizando a súa recollida periódica así como dos voluminosos.