Pleno Ordinario

O luns 28 de decembro ás 14:50 h. celebrarase un pleno ordinario na casa do Concello coa seguinte orde do día:
1. Aprobación actas sesións anteriores.
2. Coñecemento das resolucións da Alcaldía.
3. Rogos e preguntas.

Novamente, o grupo de goberno do PP convoca un pleno totalmente valeiro de contido.

Asemblea Local de Portas

O sábado 12 de decembro ás 19:30 h. celebrarase unha asemblea no local da Antiga Cámara Agraria en Portas.
Trataranse temas de política local.
Rógase asistencia e puntualidade.

A intolerancia do PP non impide que as iniciativas do BNG sexan tratadas en pleno

Pleno Extraordinario en Portas solicitado polo BNG

Mañá, xoves 2 de decembro ás 14:50 h. celebrarase unha sesión extraordinaria do Pleno do Concello de Portas solicitada polo grupo municipal do BNG para tratar 7 mocións que o Partido Popular se negou a incluír na orde do día de plenos ordinarios.
O PP facendo gala da súa intransixencia e falla de vontade democrática, négase a debater coa oposición sobre os temas que lle preocupan á cidadanía. As sesións ordinarias dos plenos son sistematicamente baleiradas de contido, incluíndo de forma estrita só os puntos de orde que a lei impón, a saber: aprobación de actas anteriores, comunicación de resolucións da Alcaldía e rogos e preguntas. Impedindo de forma efectiva o traballo da oposición.
Ante esta situación, o BNG fixo uso do seu dereito e solicitou un pleno extraordinario para obrigar a que as demandas das veciñas e veciños de Portas sexan escoitadas polos seus gobernantes, que se din chamar populares.
As iniciativas do BNG que se debaterán serán:
1. Lista de acredores, reclamando información das débedas de larga duración.
2. Recheos no entorno do río Barosa, para solicitar ao Concello de Barro a modificación do proxecto de mellora do entorno do río Barosa e evitar os recheos.
3. Fondo estatal para o emprego e a sustentabilidade local 2010, propoñendo unha serie de actuacións con cargo a este fondo.
4. Horario e publicidade dos plenos da corporación, solicitando que os plenos sexan convocados nun horario axeitado para a participación cidadá.
5. Local de reunión para os grupos políticos, para o cumprimento da lei.
6. Hospital único para a área sanitaria norte de Pontevedra, reclamando a construción inmediata dun hospital único e público.
7. Gratuidade dos libros de texto, instando á Xunta a garantir a súa continuidade.

Ante a parálise do goberno municipal de Portas, e a súa negativa a debater as mocións da oposición sobre os asuntos que realmente lle importan ás veciñas e veciños, o Bloque Nacionalista Galego solicitou un pleno extraordinario que se celebrará mañá xoves ás 14:50 h.

Pleno Extraordinario solicitado polo BNG

O xoves 3 de decembro celebrarase un pleno extraordinario na casa do Concello ás 14:50 h., por solicitude do Grupo Municipal do BNG, coa seguinte orde do día:
1. Gratuidade dos libros de texto.
2. Hospital único para a área sanitaria norte de Pontevedra.
3. Local de reunión para os grupos políticos.
4. Horario e publicidade dos plenos da corporación.
5. Fondo estatal para o emprego e a sustentabilidade local 2010.
6. Recheos no entorno do río Barosa.
7. Lista de acredores.

Cea-lembranza a tres amigos e compañeiros

O sábado, 21 de novembro ás 21:00 h. celebrouse unha cea-homenaxe para lembrar a tres amigos e compañeiros falecidos recentemente: Manolo García, Idelfonso Antón e Manolo "Padín".

A cea celebrouse no restaurante "Chaido dos Latorre" en Portas cun grande éxito de asistencia, onde amigos e familiares recordaron o seu traballo e bo facer en favor dos veciños e veciñas de Portas.

O BNG de Portas solicita a dimisión do Alcalde

Fronte a un PP desbordado e desgastado, preséntase un BNG forte que traballa por solucionar os problemas da veciñanza

Onte, luns 16 de novembro ás 14:50 h celebrouse unha sesión extraordinaria do Pleno do Concello de Portas a petición dos grupos da oposición, para que o Pleno se pronunciase sobre a situación creada pola imputación do Alcalde, Roberto Vázquez (PP) en gravísimos delitos, tanto no ámbito persoal por fraude fiscal á facenda pública, como na súa ostentación de cargo público por negociacións prohibidas aos funcionarios cando autocontratou ás súas empresas familiares para traballos no concello.
O pleno transcorreu tal como se esperaba. Dunha parte, o voceiro do Bloque enumerou algúns dos numerosos escándalos nos que está implicado o Alcalde, e pediulle ao grupo popular que fixese un exercicio de autoreflexión e responsabilidade para que fosen quen de antepoñer os intereses dos veciños e veciñas de Portas aos intereses particulares do Alcalde. Doutra parte, o Alcalde acurralado pola oposición e polos procesos xudiciais abertos contra el, continuou coa súa particular fuxida cara adiante, negando todas as imputacións e acusando á oposición de orquestrar unha conspiración contra el, montando un xuízo paralelo.
O Partido Popular, apoiado na súa maioría absoluta, impediu a reprobación do Alcalde, pero non puido evitar que se evidenciase que hai un grupo, o popular, desgastado e consumido polos procesos xudiciais, mentres que doutro lado atópase un grupo forte que traballa para resolver os problemas reais da xente, propoñendo ideas en lugar de causar problemas.

Pleno Extraordinario para reprobar o Alcalde de Portas

O Alcalde de Portas acosado por numerosos procesos xudiciais

Mañá, luns 16 de novembro ás 14:50 h. celebrarase unha sesión extraordinaria do Pleno do Concello de Portas a petición dos grupos da oposición, para que o Pleno se pronuncie sobre a situación creada pola imputación do Alcalde de Portas, Roberto Vázquez Souto (PP) en gravísimos delitos, tanto no ámbito persoal por fraude fiscal á facenda pública, como na súa ostentación de cargo público por negociacións prohibidas aos funcionarios.
Tamén hai que ter en conta outras moitas denuncias de particulares interpostas contra o rexedor de Portas nos xulgados polas súas actuacións dende o goberno local. Denuncias que, pola lentitude da xustiza, están sen resolver a día de hoxe, o que lle permite ir capeando a tempestade.
Tampouco hai que esquecer multas que a Delegación do Goberno lle impuxo recentemente ao Alcalde por infrinxir a lei que prometeu cumprir cando tomou posesión do seu cargo. Multas que teremos que pagar do noso peto todos os veciños e veciñas de Portas, así como as cargas das defensas legais.
No mesmo pleno tamén se tratarán outros asuntos:
- solicitude de documentación e certificacións que o grupo de goberno e a secretaria municipal se negan a proporcionar á oposición, e
- construción dun enlace entre a estrada PO-8004 (Caldas-Vilanoviña) e o futuro corredor Pontevedra-Vilagarcía.

O grupo municipal do Bloque Nacionalista Galego reclama a dimisión do Alcalde de Portas, Roberto Vázquez Souto, pois cada día que segue no seu cargo acrecenta o dano sobre este pequeno pero honrado Concello, avergonzando ás súas veciñas e veciños, que non se merecen tal trato.