Convocatoria Extraordinaria da Comisión Especial de Contas

O venres 28 de maio ás 14:50 h. celebrarase unha reunión da Comisión Especial de Contas na Casa do Concello coa seguinte orde do día:

1. Aprobación de acta anterior.

2. Informe conta xeral exercicio 2007.

3. Informe conta xeral exercicio 2008.

Asemblea local de Portas

O domingo 23 de maio ás 12:00 h. celebrarase unha asemblea no local da Antiga Camara Agraria en Portas.

Trataránse temas de política local.

Rógase asistencia e puntualidade.

O 17 de maio temos que encher o Obradoiro

A adxudicación a dedo da cafetería da Azucreira divide aos hostaleiros de Portas

Nova publicada en La Voz de Galicia de 10 de maio de 2010

A concesión do bar do edificio sen poxa previa foi denunciada polo BNG

División de opinións entre os hostaleiros de Portas por mor de facerse público que o alcalde, o popular Roberto Vázquez, adxudicou a dedo a través dunha autorización en precario a explotación do edificio da Azucreira cun bar-cafetería. La Voz contactou onte con varios establecementos para coñecer a súa opinión respecto diso.

Todos os consultados accederon a dar a súa versión coa condición de que o seu nome e o do local queden no anonimato. Algúns expresaron o seu malestar co proceder do rexedor e outros se mostraron indiferentes. Como exemplo, dous testemuños. «Eu non entro nin saio. Non me interesa ese tema, eu estou ao meu e nada máis», comentou un hostaleiro de Portas.

Outro criticou a decisión de Vázquez Souto e non descartou algunha medida, xa que «o malestar é grande»: «¿Que me parece? é unha cousa inxusta. Eu pensaba que estaba legal e agora decátome polo xornal de que foi unha adxudicación a dedo». O propietario deste restaurante falou de «competencia desleal aproveitándose dun local público» ao non haber licitación nin poxa pública previa. «Non se pode dar algo aos amigos aproveitándose do ben de todos», remachou.

O BNG de Portas, que o venres deu a coñecer o caso, non quixo difundir o nome do adxudicatario do bar ao entender que «quen actúa irregularmente é o alcalde, non o concesionario». Con todo, o nome desa persoa estaba onte en boca dos hostaleiros. Fontes consultadas por La Voz afirmaron que se trata dunha muller, familiar directa de David Neira Caldas.

Este home testificou o pasado 23 de febreiro no xuízo contra o rexedor por contratar obras e servizos do Concello a empresas da súa familia. En concreto, David Neira foi citado a declarar polo fiscal como socio da empresa Escavaciones Luneira, dedicada ao movemento de terras. Na sentenza, que condenou a Roberto Vázquez a un ano de suspensión e unha multa de 3.600 euros por un delito de negociacións prohibidas aos funcionarios, afírmase que Excaciones Luneira foi unha «empresa interposta» que serviu para evitar unha contratación directa do Concello con entidades vinculadas ao rexedor.

O BNG denuncia a cesión irregular do edificio da Azucreira

Cacicada e concesión a dedo do Alcalde de Portas

Con data de 31 de marzo de 2009 o Alcalde de Portas, Roberto Vázquez, sen coñecemento do Pleno da Corporación, nin sequera da Xunta de Goberno, autorizou a cesión de uso en precario por un periodo de dous anos do auditorio, a sala de exposición e o salón do edificio da Azucreira a unha persoa particular (ver documento adxunto). Este concesionario, con coñecemento do alcalde, está a explotar economicamente as instalacións mediante un bar-cafetería, pero sen licitación ou poxa pública.

O alcalde está a cometer unha ilegalidade porque autoriza o uso dunhas instalacións municipais a unha persoa concreta sen que ninguén máis poida optar á cesión. Tampouco os negocios próximos poden competir en igualdade de condicións, pois o concesionario non ten que pagar ningún tributo ao concello, nin o consumo de auga e electricidade. Esta é unha cacicada e unha concesión a dedo intolerable.

O BNG non cuestiona se a xestión do actual concesionario das instalacións é axeitada ou non, sen embargo, a cesión é irregular e comporta unha gran inseguridade xurídica para o concesionario en caso dalgún incidente.

O Bloque Nacionalista Galego esixe a revogación inmediata da autorización, e se convoque unha poxa pública, de acordo aos principios de publicidade, concorrencia, transparencia, igualdade e non discriminación, establecendo unhas bases con criterios obxectivos que garantan a igualdade de oportunidades dos interesados na explotación do bar, ademais de evitar a competencia desleal cos negocios próximos.

Nota: o nome do beneficiario do contrato e a súa sinatura mantéñense ocultos deliberadamente para que non se vexa prexudicado. Consideramos que quen actúa irregularmente é o Alcalde, non o concesionario.

Portas celebra o primeiro pleno ordinario en 4 meses

O BNG esixirá a dimisión do alcalde condenado por corrupción

Mañá, venres 30 de abril ás 14:50 h., celebrarase na casa do Concello de Portas o primeiro pleno ordinario en máis de 4 meses.

Dende o último pleno celebrado a finais de decembro do pasado ano, aconteceron distintos sucesos de moita transcendencia para o Concello de Portas.

Neste tempo, o alcalde Roberto Vázquez (PP) foi xulgado e condenado a pagar unha multa de 3600€ e un ano de inhabilitación por negociacións prohibidas aos funcionarios. A sentenza considera probado que o alcalde se aproveitou do seu cargo público para gañar cartos a costa dos veciños e veciñas de Portas, tratando de ocultalo mediante empresas interpostas. Iso é corrupción!

Recentemente tamén aconteceu o tráxico falecemento do responsable local do BNG, o compañeiro Keko. Aínda que esta irreparable perda produciu unha grande consternación no grupo municipal do Bloque, que será difícil de superar, estamos decididos a encarar o futuro e proseguir cunha firme labor de oposición, propoñendo unha alternativa de goberno para o Concello de Portas.

O Bloque Nacionalista Galego de Portas esixirá a dimisión inmediata do Alcalde Roberto Vázquez, condenado por corrupción, e demandará que o grupo de goberno do Partido Popular atalle a corrupción e releve das súas funcións ao rexedor de Portas.

Pleno Ordinario

O venres 30 de abril ás 14:50 h. celebrarase un pleno ordinario na casa do Concello coa seguinte orde do día:

1. Aprobación actas sesións anteriores.

2. Ordenanza reguladora do prezo público pola prestación do servizo de axuda no fogar e persoas valoradas como dependentes.

3. Ordenanza reguladora da licenza da tenza de animais potencialmente perigosos.

4. Renuncia concelleiro D. Francisco Xavier Loureiro Vázquez.

5. Falecemento concelleiro D. Jorge Fernando García Pampín.

6. Coñecemento das resolucións da Alcaldía.

7. Rogos e preguntas.