Roberto Vázquez Souto deberá pagar máis de 315.000 euros para evitar o cárcere
 |
| Roberto Vázquez Souto, alcalde de Portas |
O alcalde do concello pontevedrés de Portas, Roberto Vázquez Souto, foi condenado polos delitos de falsidade documental e fraude contra a Facenda Pública, recoñecidos polo acusado, nun xuízo onde a súa defensa, a Avogacía do Estado, e a fiscalía chegaron a un acordo.
A Axencia Tributaria estableceu o prazo de dous anos para pagar máis de 315.000 euros, cuantía correspondente ás multas, o importe fixado como responsabilidade civil e o que sustitúe ás penas de prisión por ambos delitos.
A pena leva aparellada a inhabilitación para administrar sociedades, pero non influirá no cargo público que ostenta como alcalde do municipio pontevedrés.
Neste sentido, o fiscal Augusto Santaló explicou que "cometeu os delitos en calidade de administrador dunha sociedade e nesa calidade foi xulgado". Por elo, a inhabilitación que se lle aplica non afecta ao seu cargo como rexedor municipal porque "o delito foi cometido no ámbito empresarial, non como alcalde nin como funcionario público", precisou Santaló.
Vázquez Souto goberna dende fai cinco lexislaturas o municipio de Portas e é un dos alcaldes do Partido Popular que máis se perpetuou no cargo. A pena afecta á súa actividade ao fronte da promotora inmobiliaria Pazos Souto 2000 S.L. por evadir impostos e falsificar documentos a tal efecto. Solicitou formalmente a baixa provisional no Partido Popular durante o mes de xullo.
Desglose
Roberto Vázquez chegou aos Xulgados de A Parda sobre as 10.10 horas, vinte minutos antes da hora fixada para o comezo da vista, que non comezou ata as 11.50 horas e durou apenas 10 minutos.
Polo delito continuado de falsidade documental, a condena acordada supón 3 meses de prisión, inhabilitación para exercer o cargo de administrador de sociedades durante o mesmo período e multa de 6 euros diarios durante tres meses.
En canto ao delito contra a Facenda Pública, a pena de prisión ascende a seis meses, o mesmo tempo que se lle inhabilita como administrador de sociedades, unha multa de 98.443,90 euros e a privación para obter subvencións e desgravacións fiscais durante un ano e tres meses. A condena contempla que Roberto Vázquez terá que pagar 151.462,15 euros en concepto de responsabilidade civil, máis 52.353,32 euros de intereses e as costas, de 9.133,20 euros.
A letrada do despacho Garrigues Abogados, que representaba a Roberto Vázquez, solicitou que as penas de prisión se substitúan polo pago dunha multa que supera os 3.000 euros, a razón de 6 euros diarios durante 18 meses. O fiscal, Augusto Santaló, non se opuxo a esta petición porque o acusado "non ten antecedentes".
Rebaixa
Así, a condena imposta suón unha rebaixa con respecto á proposta do escrito de acusación, que solicitaba 2 anos de prisión e outros dous de inhabilitación especial para o dereito de sufraxio pasivo, así como 12 meses de multa cunha cota diaria de 15 euros polo delito de falsidade; e dous anos de cárcere, dous de inhabilitación especial para o dereito de sufraxio pasivo, multa de 300.000 euros e perda do dereito a recibir beneficios ou incentivos da Seguridade Social durante cinco anos.
