Moción do BNG sobre a xestión e administración da web e a páxina de Facebook do concello de Portas

O grupo municipal do BNg ven de presentar unha moción no rexistro do concello de Portas sobre a xestión e administración da web e a páxina de Facebook do concello de Portas.

O grupo municipal do BNG considera que as novas tecnoloxías proporcionan ferramentas moi útiles para transmitir información, facilitando a comunicación cos veciños e veciñas de Portas e simplificando as xestións municipais. Entre estas ferramentas atópanse a internet e as redes sociais, sen embargo, o uso que destas ferramentas fai o concello é escaso ou case nulo, a pesares de dispor de páxina web (www.portas.es) e de páxina de Facebook (www.facebook.com/ConcellodePortas).

Tamén en numerosas ocasións o grupo municipal do BNG preguntou nos plenos ordinarios da corporación (no punto da orde do día de “rogos e preguntas”) que persoa ou persoas administraban estes sitios webs, non obtendo contestación por parte do grupo de goberno en ningunha ocasión.

Así mesmo, o grupo municipal do BNG observa con incredulidade que no “muro” da páxina de Facebook do Concello de Portas se “filtran” e borran entradas ou comentarios de forma selectiva facendo un uso partidista dos recursos propios do concello de Portas.

Moción do BNG para solicitar a remisión das actas da Xunta de Goberno

O grupo municipal do BNG de Portas ven de presentar no rexistro do concello unha moción para solicitar a remisión das actas da xunta de goberno no prazo que establece o Regulamento de Organización, Funcionamento e Réxime Xurídico das Entidades Locais.

O goberno municipal do Concello de Portas incumpre sistematicamente a normativa de obrigado cumprimento, entregando as copias das actas das sesións da Xunta de Goberno fóra do prazo establecido, impedindo de xeito efectivo o traballo de fiscalización da oposición.

O grupo municipal do BNG esixiu o cumprimento da legalidade en innumerables ocasións nos plenos ordinarios dos últimos 5 anos no punto da orde do día de “rogos e preguntas” pero con nulo éxito. Igualmente, o grupo municipal do BNG chegou a solicitar dous plenos extraordinarios (22 de setembro de 2008 e 28 de maio de 2009) tratando explicitamente este asunto. En ambas ocasións aprobouse por unanimidade a remisión das copias das actas da Xunta de Goberno en menos de 10 días dende a súa celebración, sen embargo, o resultado obxectivo é que non se cumpren os acordos plenarios pola nula disposición do goberno municipal. Incluso o grupo municipal do BNG tivo que chegar a demandar o cumprimento da legalidade ante o valedor do pobo, que concluíu en “lembrar ao Concello o deber legal de respectar os prazos establecidos para remitir aos concelleiros a devandita documentación”.

Todos os anteriores intentos de esixir que o goberno municipal cumprira a legalidade foron infrutuosos, e de feito as demoras son cada vez maiores e máis habituais.

A día de hoxe o grupo municipal do BNG leva sen recibir as actas da xunta de goberno dende hai máis de 4 meses.

Mitin en Portas

O domingo 14 de outubro, ás 12:00 h na Casa da Cultura de Portas, mitin en Portas. Falarán:
Arturo Fontán, concelleiro e voceiro municipal.
Iria Aboi, candidata pola provincia de Pontevedra e secretaria xeral de Galiza Nova.

Non daremos bocadillo pero pasaremos un rato agradable.

En bloque podemos!!!

Pleno extraordinario

O mércores 26 de setembro as 14:50h celebrarase un pleno extraordinario na casa do Concello coa seguinte orde do día:

1. Aprobación actas sesións anteriores.
2. Nomeamento membros mesas electorais (Eleccións Parlamento de Galicia 2012).

Pleno Extraordinario

O venres 31 de agosto ás 15:50 h. celebrarase un pleno extraordinario na casa do Concello coa seguinte orde do día:

1. Condena de Roberto Vázquez Souto por fraude fiscal e falsidade documental.
2. Moción contra as recentes medidas económicas e reforma do réxime local do goberno central.

Pleno ordinario

O venres 31 de agosto ás 14:50 h. celebrarase un pleno ordinario na casa do Concello coa seguinte orde do día:

1. Aprobación acta sesión anterior.
2. Escrito grupo Partido Popular do concello.
3. Orzamento municipal 2012.
4. Aprobación conta xeral exercizo 2011.
5. Coñecemento resolucións da Alcaldía.
6. Rogos e preguntas.

Suplemento do boletín informativo - Agosto 2012

Debido ao adianto do xuízo de conformidade, o BNG de Portas publica este suplemento ao boletín informativo que se editou o pasado 14 de agosto, actualizando a información.